每年亞視都舉辦「十大廣告大獎」，但廣告創作人這獎項的重視程度，等如零。 因為大家都有「唯有創者留其名」的心態，想創作幽默，抵死，啜核，一睇難忘果種廣告（如前兩篇 entry 的啤酒廣告)，而唔係亞視果 D 十大廣告，我唔中意你去捉魚果種。 本地廣告創作人最重視的獎項，叫「香港廣告商會創意大獎」，即 HK4As Creative Awards。純綷以創意為評審標準。 但事實上，打開報紙雜誌電腦電視，有幾何會見到有精采既廣告呢？ 我可以答你，冇！ 你可能會問，咁 D 廣告人咪好冇癮？！ 我可以答你，係！ 所以廣告創作人有一種解脫方式，呢種方式，叫做「飛機稿」！ 飛機稿，係魯訊筆下阿Q精神既完美演釋，簡單黎講，即係假廣告，通常只會嚮某冷門雜誌出一期或半夜三點嚮有線娛樂新聞台只播一次。除非你時運低，否則冇乜機會睇到。 你可能會問，既然冇人睇到，咁做黎做乜呢？ 答：為左參加 HK4As Creative Awards 或其他國際廣告創作大獎。所以，呢類廣告既演釋手法，都會同上一兩年各國際廣告創意大獎得獎作品差唔多。 ‧ ‧ ‧ ‧ ‧ ‧ ‧ ‧ ‧ ‧ ‧ ‧ ‧ ‧ ‧ ‧ ‧ ‧ ‧ ‧ （續上集） 又返返去太古城果間房。 兩個CD不停搬出好多說話。 「知唔知而家好多品牌都唔多用廣告架喇？！」 「我地既工作就係，即使壇Job 係 Shit，我地都要儘量令到件事冇咁 Shit。」（真架！真係從一個人口度講出黎架） 講講下，房內由五個人變成三個人。變成我俾兩個CD「圍」。 點解？好明顯我講錯野啦，話做出黎 D 廣告垃圾。乜話，國皇冇著衫？ 如果當時有旁觀者，可能已食緊花生等睇戲了。（太古城office 樓下有戲院，食爆谷都得） Manage 一個唔順超的員工，係好難搞既事。 RCD：「拿，其實你可以做下呢 D 丫！」 說罷他拿起一本方太煮食雜誌（唔記得個名係乜了），揭開其中一版，正係一位同事做既「飛機稿」。 唔講由自可，一講把幾火。 叫我做「飛機」？？？ 飛機稿點解叫飛機稿？就係因為D人唔掂，要自我滿足先做出黎既好事嘛。 我做廣告，都係想引普羅大眾一粲，幽天下之事一默姐，等大家唔好咁悶時，又可以畀我 wag 下 the dog。 閉門起機，免喇！ 散會。 其實，創意，可以好簡單。 好似 www.subservientchicken.com 咁，美國 Crispin Porter + Bogusky 廣告公司出品。 低成本，高效用。一個電視廣告你睇盡睇晒一分鐘，登一頁報紙雜誌，讀者一揭即過。呢個 website，全球各電腦任玩，平均每人逗留七分鐘。呢 d 咪創意。 經此一役，一返太古城，無名火起三千萬丈。 老細個秘書問我某星期五晚得唔得閒，未知做乜已話唔得。 原來慶功，去中上環食法國菜，個法文名，好複雜，記都記唔到。慶祝乜？成功贏取兩個樓盤客戶，兩套廣告都出晒街，不過我諗冇人留意過。（連Grand Waterfront都不如，唉） 嬲嬲地，慶功當晚，我都去左中上環晚飯。 不過我去果間冇法文名亦冇英文名。 我去左九記牛腩。 更精采的，還在後頭。 （待續） | 
