Currently Listening Meet Joe Black: Original Motion Picture Soundtrack By Thomas Newman see related

二零零零年。春天。星期六。下午。

新亞書院一個課室。

房內大概坐著廿幾人。其中一個，係我。

電視播緊既，係剛過去一星期「出街」既電視廣告。

播放完畢後，講師（兼知名廣告人）將手上的遙控一撳，然後轉頭講：

『呢D，就係垃圾廣告喇。』

一D都冇錯。

今時今日，情況依舊，甚至更差。

打開電視，見到D廣告，百居其九十九，都係垃圾。

‧　‧　‧　‧　‧　‧　‧　‧　‧　‧　‧　‧　‧　‧　‧　‧　‧　‧　‧　‧　

時間飛快咁跑到二零零六年入秋時分的一個下午。咁快，跑到腳跛。

地點係太古城某廣告公司某一個房間。

房內得五個人。其中一個，係我。

望下日曆，原來我炮製垃圾廣告的生涯，已過一年。

『我地唔要畀 Account Service 同事做我地 CD』

註：CD 者，非鐳射唱片，乃廣告界其中一重要職位，Creative Director 創作總監是也。而說出上述一番話的，正是公司的其中一個聯合創作總監 (ACD)。Account Service 乃客戶服務部，生作性質 Suppose 是廣告公司與廣告商溝通的重要橋樑，可以成日幫到忙。但結果往往係阻頭阻勢，成日幫倒忙。英國有一間以創意著名的廣告公司 Mother，製作的廣告創意精奇，新鮮幽默，我總覺得與他們沒有 Account Servicing Department 有莫大關係。

唔聽由自可，一聽把幾火。

而家個客捉住你隻手做野呀，仲賴落 Account Service 身上。

不過當然，好多人講野總係勁過 Kinder 出奇蛋，分分鐘充滿驚喜。

幾分鐘前，當房內的 RCD(Regional CD)　問大家有甚麼要 Improve 的時候，這 ACD 的答案是：『我 Too Nice 喇』

一向唔識扮三扮四。真實唔真實？Blog 既我同真實世界既我分別不大。所以我出左句聲。

「而家跟本都唔係呢個問題。你睇下我地之前做果D JOB，畀人捉住隻手黎做咁滯，根本同 Account Service 同事冇關係喎」

寂靜是開會的大忌，所以不久又有 Kinder Surprise。

『但係咁個客先會信你嘛！』

一字記之曰：正。

人地餵你食屎，我話唔想食屎，得到的答案是，你食得開心，人地先繼續畀野你食嘛。

明冇？

果一刻我真係明晒。

更精采的，還在後頭。

（待續）